Ubutumwa bwo ku wa 29/10/2016
Ukw’Imana ishaka abantu bayo
Icambere Umwami Imana idushakako nuko dukurikiza ivyagezwe vyayo bo n’Ijambo ryayo. Kuko ababikurikiza bagira imigisha, ikabana nabo. Ivyo bakora vyose bikabamwo ikiganza ciza c’Imana.  2 Abami 18: 1-8 Imbere y’umwami Hezekiya, Abisirayeli bari basigaye batagira Imana Rurema muri bo; basenga ibigigwamana ari navyo bosereza imibavu. Bagasenga za Bayali, bagakurikiza imigenzo y’abanyamahanga ndetse bagakora ivy’Uhoraho abona kwari bibi vyose. Ariko Hezekiya yagize umwete wo kurondera Uhoraho Umwami Imana, arasoma ivyagezwe Imana yahaye umusavyi wayo Mose, akurikiza ijambo ry’Imana ryanditse mu gitambo ceranda. Agenda akuraho ibicaniro vya za Asheka, agakuraho n’ibigigwamana vyose vyubakiwe ku mpinga z’imisozi, arabimenagura vyose , nayanzoka Mose yacura bari basigaye bayosereza imibavu, n’ibindi vyinshi vyabayovya abikuraho.
Hezekiya asubizaho Igicaniro c’Uhoraho, aha kandi ahesha agaciro Imana y’Abisirayeli. Aracubahiriza, asubiza ibintu ku rutonde kuko Mose yabivuze, kuko bari basigaye  babikora uko bashatse ndetse nigihe babishakiye n`uburyo bagomvye. Hezekiya yagize imigenderanire myiza n’Imana, ico yakora cose yagira ikiganza ciza c’Imana. Ikintu ca mbere umuntu akeneye mu buzima bwiwe, n’ukugira Imana muriwe. Abantu benshi bibazako kugira amashure menshi canke kugira amahera menshi arivyo bikenewe mu buzima , ariko igikenewe kurusha ivyo vyose n’ukugira Imana mu buzima bw’umuntu. Nico catumye Hezekiya nivyo yakora vyose vyagenda neza. Abantu bahindukirira Imana buzura ubwiza bw’Imana. Hezekiya yasizeho umuco mwiza wo gusenga, bagira ubusabane bwiza n’Imana, butubakiye kuvyo bo bashaka ariko bwubakiye kuvy’Imana ishaka. Mwene Data, dutegerezwa kumenya neza ko atari twebwe duhitamwo ingene tubana n’Imana, ariko n’ijambo ryayo yasizeho, abe ariryo dukurikira.  Iyo uhagaze neza mu Mana isi irakugwanya cane. Yesaya 36: 4-6 & 18 & 21 Kuba warakijijwe ur’umwana w’Imana ntibibuzako ugira ingorane canke ibibazo mu buzima. Kuko haribihe biza bigushira ku mu nzane, kugirango bipime agakiza kawe. Ariko waramwihaye wese, vyose birakurengana, Yesu Kristo akabigutsindanishiriza nkuko yanesheje isi. Mu mibereho y’isi, abantu bishimira amashure, ubwenge, amafaranga, abantu, n’ibindi… ariko Hezekiya we yishimiye Uhoraho Imana yiwe. Intumwa z’umwami w’I Ashuri zimaze kuzana amajambo yo gutuka Imana nzima n’umwami Hezekiya, ariko abantu ba Hezekiya ntibagira ico babishura kuko umwami wabo yari yababujije. Kuko har´igihe bidusaba guhora kugirango turindire ijwi ry’Imana yacu, rijanye n’ibihe turimwo. Iyo turi kumwe n’Imana, kimwe mu bintu Imana igukorako n´ugukuraho ubwoba mu buzima bwawe. Yesaya 37: 6-10 & 33-38.  Igihe cose hariko hakoreka ivyo muri Mpwemu Satani arapfuha, agahagurutsa abakozi biwe ngo bagwanye imirimo y’Imana n’abakozi b’Imana. Nico gituma Imana idutumirira gusenga ubudahumeka. Kuko iyo dusenga, Imana irarungika Umumalayika akaza gutabara. Nkuko yabikoze no murico gihe ca Hezekiya.
Ivyak. n’Intum. 12 : 5-9 & 20-24 Kuvyuka kw’ishengero bagasenga, kwatumye Petero atabagwa. Mugihe batari bwashiremwo ishaka ryo kwinginga Imana ngo biyegurire gusenga Yakobo baramwishe. Ariko Imana yarumvise gusenga kwabo bakobeje, baririra ubuzima bwa Petero naho nyene Imana yarungitse Umumarayika gukura Petero mw’ibohero, aramukiza urupfu. Kandi Umwami Imana ntiyarekeye aho, nkuko yatumye umwami w’i ashuru abana biwe bamwica, niko Umumalayika w’Uhoraho yakubise Herode aturika inyo agacikana, kuko yariko agwanya Imana n’abakozi bayo. Isengesho n’ikintu kidasanzwe iyo rivuye ku kwizera nyakuri. Nico gituma Uhoraho Imana ashaka ko tumwubaha, tugendere mw’ijambo ryayo kandi dukurikiza ivyagezwe vyayo. Tumuhe agaciro kanini mu buzima bwacu nawe atugwanirire tube mu buzima bw’intsinzi muri vyose. Amen.