Ubutumwa bwa 14.03.2015
Dutahure kandi tumenye ubasha bw’Umusaraba wa Yesu Kristo.
Umusaraba wa Yesu Kristo niwo udutahuza koko urukundo Imana yadukunze, yo yemeye kurungika umwana wayo w’ikinege ngo aze awikorere kubwacu,n’urukundo Yesu kristo yadukunze we yemeye kubabazwa kugira ngo adukize. Jean 3: 14-16
Igihe abisirayeri bidodombera Imana bari mu nzira ija ku kiyaga gitukura, yabateje inzoka zifise ubumara zirabarya. Bahindukirira Mose baramutakambira ngo abasabire imbabazi k’Uhoraho.
Imana ibwira Mose ngo acure inzoka isa nazo ayimanike ku giti c’intumba, ngo maze uwakomowe wese niyayiraba arakira. Guharura 21: 4-9.
Yesu Kristo nawe yaje yambaye ishusho y’Umwana w’umuntu kugira ngo adukize.Yaremeye araza yambara umubiri w’icaha, ata caha yakoze, arabambwa ku musaraba ariko yabikoze kugira ngo atsindanishirize uwuzomwizera wese.
Yesu Kristo yadukuyeko icete kitwagiriza akibamba ku musaraba i Golgota. Ab’Ikolosayi 2: 13-15
Kuri uwo musaraba niho twaronkeye agakiza
Gukizwa vy’ukuri n’ukuba warawutahuye.
Kumenya uwo musaraba bidutandukanya n’icaha, niko gakiza. Kuko tuzi ko iyo twongeye gucumura tuba twisubirije Yesu Kristo ku musaraba. Abaheburayo 6: 4-6
Umusaraba wa Yesu Kristo n’inyishu y’ibibazo vyose. Iyo umuntu agiye mu kibazo icarico cose, yibuka ko Yesu Kristo vyose yabirangirije ku musaraba i Golgota. Na satani aguteye ukamwibutsa uwo musaraba araguhunga.
Kubw’uwo musaraba, satani afise akarimbi adashobora kurenga nico gituma azokwama atsindwa ibihe vyose.
Ubushobozi bw’umusaraba.1 Kor. :18
Ijambo ry’umusaraba ku bahona n’ubupfu ariko kuri twebwe abakizwa n’ubushobozi bw’Imana.
Muri uwo musaraba niho hari ibanga n’ubushobozi vyihishije tudatahuzwa n’ubwenge bwacu ariko dutahuzwa na Mpwemu w’Imana. 1 Kor.1: 20-31
Ubupfu bw’abantu burusha abantu ubwenge, kandi intege nke z’Imana zirusha abantu inkomezi. Imana yatoranije ibipfu vyo mw’isi ngo imaramaze abanyabwenge. Kandi yatoranije ibinyantegenke vyo mw’isi ngw’imaramaze ibikomeye.
Ariko tweho ntitwahawe impwemu y’isi, twahawe Mpwemu ava ku Mana kugira ngo tumenye ivyo Imana yatugabiye. 1 Kor.2: 12-14.
Ni naco gituma dukwiye gusenga cane tukinginga Imana ngo idufungure amaso yo muri Mpwemu ngo adutahuze ibanga ry’uwo musaraba. Ni twatahura iryo banga tuzokwamana intsinzi muri vyose kandi ibihe vyose.
Imana itanga ivyizigiro ibuzuze umunezero wose n’amahoro biva ku kwizera kugira ngo murushirize kwizigira ibizoba mubihawe n’ubushobozi bwa Mpwemu Yera. Abaroma 15:13. Amen.